२६ असोज, काठमाडौँ ।
प्रधानमन्त्री केपी शर्मा ओलीले सांस्कृतिक परम्पराहरुले समाजमा अनुशासन कायम राख्दै सबैको सम्मान र सत्यको जीतको सन्देश बोकेकाले राम्रा कुरालाई निरन्तरता दिनुपर्ने बताएका छन् । नेपाली कांग्रेसले आइतबार सानेपास्थित पार्टी कार्यालयमा गरेको चियापान समारोहमा बिजया दशमी, दिपावली तथा छठको शुभकामना दिदै उनले संस्कृतिका नाममा विद्यमान गलत परम्परालाई परित्याग गर्दे राम्रा कुरालाई अंगाल्नुपर्ने बताएका हुन् ।
उनले समाजको सुसम्बन्ध र सुव्यवस्था बनाई राख्न तथा सत्यको जीत र असत्य पराजित हुन्छ भन्ने सन्देश हाम्रा परम्परा र संस्कृतिले दिने गरेको भन्दै उनले राम्रा कुरालाई निरन्तरता दिने अभ्यासमा जुट्नुपर्ने बताए । उनले कांग्रेस सभापति शेरबहादुर देउवा र रामचन्द्र पौडेलसंगको सम्बन्ध ४५ बर्ष देखिको भएको उल्लेख गर्दै चाडपर्वले सम्बन्धलाई अझै राम्रो बनाउने बताए । सरकारको लोकतन्त्र प्रतिको निष्ठामा कांग्रेसले प्रश्न उठाएको छ नि भन्ने पत्रकारहरुको जिज्ञासामा उनले शुभकामना आदानप्रदानका बेला धुलो चकमक लगाउने काम नगरौँ भन्ने नवाफ दिए ।
नेपाली कांग्रेसका सभापति शेरबहादुर देउवाले चिनियाँ राष्ट्रपति सी जिनपिङको भ्रमणलाई कांग्रेसले स्वागत गरेको बताए । उनले भ्रमणले दुई देशबीचको सम्बन्धलाई थप घनिष्ट बनाउने विश्वास आफुले लिएको बताए । उनले राष्ट्रपति सीले आफुलाई चिन भ्रमणको निम्तो दिएको र आफुले ‘मिलाएर आउँछु ’भनेको पनि जानकारी गराए ।
नेकपाका अध्यक्ष पुष्पकमल दाहालले नेपाली कांग्रेसले स्थापित गरेको चियापान कार्यक्रम राष्ट्रिय राजनीतिक संस्कृति जसरी स्थापित भएको बताए । उनले परिर्वतनको सहयात्रीहरुको बीचको शुभकामनाको रुपमा आफुले चियापान कार्यक्रमलाई लिएको र सहयात्रीकै बीचमा आएको अनुभव आफुले गरेको बताए । दुई तिहाईको सरकार छ कस्तो सहयात्राको कुरा हो भन्ने संचारकर्मीको प्रश्नमा उन अहिले दुई तिहाइको कुरा नगर्न आग्रह गरे ।
नेकपाका वरिष्ठ नेता एवं पुर्व प्रधानमन्त्री माधवकुमार नेपालले सत्ता र प्रतिपक्षीहरु सामाजिक कार्यक्रममा सहभागी हुने संस्कृति नेपाली राजनीतिको “ब्युटी” भएको टिप्पणी गरे । विदेशमा सत्तापक्ष र प्रतिपक्षी दलका नेताहरुबीच बोलचाल पनि नहुने भन्दै उनले नेपालमा भने सांस्कृतिक कार्यक्रमहरुमा एकसाथ भेला हुने संस्कृति नेपाली राजनीतिको राम्रो पक्ष भएको बताए । उनले चिनियाँ राष्ट्रपति सी जिनपिङको नेपाल भ्रमण भव्य र शानदार भएको दाबी गरे ।
नेकपाका प्रवक्ता नारायणकाजी श्रेष्ठले मुलुकमा राजनीतिक परिर्वतन ल्याउने समयमा भएको दलहरुबीचको सहकार्य र एकतालाई अहिले पनि निरन्तरता दिनुपर्ने बताए । उनले प्रतिपक्षी दलले राष्ट्रिय मुद्धाहरुमा सरकारसंग सहकार्य र एकता गरेर आर्थिक सम्मृद्धिको लक्षय हासिल गर्ने मार्गमा अघि बढ्नुपर्ने आवश्यकता औल्याए ।
समाजवादी पार्टी नेपालका संयोजक डाक्टर बाबुराम भट्टराईले लोकतन्त्रको सवालमा आफुहरु सधै कांग्रेससंग सहकार्य गर्न तयार रहेको बताए । चिनियाँ राष्ट्रपति सीको नेपाल भ्रमण सफल रहेको भन्दै उनले दुवै सरकारलाई धन्यवाद र बधाई पनि दिए । उनले भ्रमणको सफलतालाई ‘मामाको कोसेली’को रुपमा विश्लेषण गर्न नहुने टिप्पणी गरे ।
