२७ असोज, वीरगञ्ज । वीरगञ्जकी १४ बर्षिय मुस्कान खातुनमाथि एसिड प्रहार गर्ने दुई युवकलाई प्रहरीले अदालतमा पेश गर्ने तयारी गरेको छ । उनीमाथि एसिड प्रहार भएको ३८ दिन बितिसकेको छ ।
अभियुक्तलाई कानुन अनुसार २५ दिनभन्दा बढी हिरासतमा राख्न नपाउने भएपछि प्रहरी दबावमा छ । दशैं विदाका कारण अदालत मंगलबारबाट मात्रै खुल्दैछ । प्रहरीले काठमाडौंको कीर्तिपुर अस्पतालमा उपचाररत मुस्कानको बयान लिइसकेको छ ।
एसिड प्रहार गर्नेहरु विरुद्ध मुलुकी अपराध संहिता २०७४ को परिच्छेद १२ को दफा १ सय ८३ (ज्यान मार्ने उद्योग) र १ सय ९३ (तेजाव वा अन्य रासायनिक, जैविक वा विषालु पदार्थ प्रयोग गरी कुरुप पार्न नहुने) मुद्धा दर्ता गरिंदैछ । जसमा दफा १ सय ३८ को उपदफा २ बमोजिम १० वर्ष कैद र १ लाख रुपैयाँसम्म जरीवाना, १ सय ९३ को उपदफा २ बमोजिम ५ देखि ८ वर्ष कैद र १ लाखदेखि ५ लाख जरीवाना र सोही दफाको उपदफा ३ बमोजिम जरीवाना वापत प्राप्त हुने पुरै रकम पीडितलाई क्षतिपूर्ति बापत दिनुपर्ने माग गरिएको छ ।
अधिकतम सजायको माग दाबीसहित सक्कली मिसिल कागजात, प्रतिवादीहरु, रायसहित जिल्ला सरकारी वकिल कार्यालयमा बुझाइसकेको जिल्ला प्रहरी कार्यालय पर्साका प्रमुख प्रहरी उपरीक्षक सोमेन्द्र सिंह राठौरले जानकारी दिए । उनले कीर्तिपुर अस्पतालबाट मुस्कानको पछिल्लो स्वास्थ्य अवस्थाको रिपोर्ट माग गरेको तर आइनसकेको जानकारी दिए ।
जिल्ला सरकारी वकिल कार्यालय पर्साका अधिवक्ता रुद्र पन्थिले एसिड आक्रमणकारीलाई मंगलबार अदालतमा पेश गर्ने जानकारी दिए । मुस्कानलाई वीरगञ्ज महानगरपालिका-२ बस्ने १९ बर्षीय मजिद मियाँ र १७ बर्षीय सम्साद मियाँले एसिड प्रहार गरेका थिए ।
उनीहरु नाबालक रहेको दाबी परिवारले गरेपछि नारायणी अस्पतालका ४ जना चिकित्सकको टोलीबाट उमेर परीक्षण गराइएको छ । अस्पतालका मेसु डा. मदन कुमार उपाध्याय, रेडियोलोजिष्ट डा. विजयराज खनाल, अर्थो सर्जन डा. राजदेव कुशवाहा र डेन्टल सर्जन डा. सोनी झाको टोलीले गरेको उमेर परीक्षण रिपोर्टको आधारमा उनीहरु विरुद्ध प्रहरीले मुद्धा लगाउँदैछ ।
