२ कात्तिक, काठमाडौँ ।
सिताराम कट्टेल र कुञ्जना घिमिरे ‘धुर्मुस–सुन्तली’को जोडीले निर्माण गरेको फिल्म ‘सेन्टी भाइरस’को छायांकन सकिएको छ। करिब एक महिनाको छायांकनपश्चात शुक्रबार फिल्मको छायांकन सकिएको सितारामले जानकारी दिएका छन्।
उनले सामाजिक सञ्जाल फेसबुकमा लेख्दै एक गीतको छायांकन बाँकी राख्दै फिल्मको सुटिङ प्याकअप गरिएको बताएका छन् ।फिल्मको प्रदर्शन मिति भने बाँकी एक गीतको छायांकनपश्चात नै तोकिने जनाईएको छ।
उनीहरुको होम प्रोडक्सन कम्पनी सुबिहानी फिल्मस् प्रा.लीको ब्यानरमा ‘सेन्टी भाइरस’ निर्माण भएको हो। रामबाबु गुरुङ निर्देशित फिल्ममा सिताराम, कुञ्जनासंगै दयाहाङ राई, राजाराम पौडेल, विल्सन विक्रम राई, बुद्धि तामाङ, कमलमणी नेपाल, सूर्यमाला खनाल लगायतको अभिनय रहेको छ।
सामाजिक कथावस्तुमा बन्ने कमेडी जनराको फिल्ममा कुमार कट्टेल र दीपक आचार्यको लेखन रहेको छ। डिन्डु लामा ह्योल्मो निर्माता रहेको फिल्मको सह–निर्मातामा फूर्पा लामा रहेका छन्।
राजनराज शिवाकोटी र कालीप्रसाद बाँस्कोटाको संगीत, शैलेन्द्र डी कार्कीको छायांकन रहेको फिल्म सम्पादनको जिम्मा निमेष श्रेष्ठको काँधमा छ।
