४ कार्तिक, काठमाडौं ।
ललिता निवास जग्गा अनियमितता प्रकरणको अनुसन्धानमा कांग्रेस उपसभापति एवं संसदीय दलका उपनेता विजयकुमार गच्छदारसमेत तानिएका छन् ।
उक्त प्रकरणमा सम्वन्धित सबैजसो व्यक्तिसँग बयान र सोधपुछपछि अख्तियार दुरुपयोग अनुसन्धान आयोग गच्छदारलाई समेत बोलाएर ‘बयान लिने’ निष्कर्षमा पुगेको छ ।
उपप्रधान एवं भौतिक योजना तथा निर्माणमन्त्री हुँदा गच्छदारले विवादित प्रस्तावमाथि निर्णय गरी मन्त्रिपरिषद्मा पठाउन स्वीकृति दिएका थिए । गच्छदारले समेत विवादास्पद निर्णय हुनुअघि प्रस्तावमा केही निर्णय गरेको भेटिएको अख्तियार स्रोतले बताएको छ ।
बयान सकिएको केही दिनमै ललिता निवासको जग्गा अनियमितता प्रकरणको मुद्दा विशेष अदालतमा लैजाने निर्णय हुनेछ । गच्छदारकै बारेमा मुद्दा चल्ने वा नचल्ने भन्नेबारे केही टुंगो लागेको छैन । बयानबाट थप कुरा पनि आउने र केही दिनमै उनको बयान थाल्ने अख्तियारको तयारी छ ।
