४ कात्तिक, कोशी टप्पु ।
कोशी टप्पु क्षेत्रको श्रीपुर–हरिपुरमा नेपाली सेनाले वृक्षरोपण गरेको छ । आईतबार नेपाली सेनाको पूर्वी पृतनाको पहल एवं कोशी टप्पु वन्यजन्तु आरक्ष सुरक्षार्थ तैनाथ शत्रूभञ्जन गुल्मको संयोजनमा आयोजित कार्यक्रमबीच वृक्षरोपण गरिएको हो ।
कार्यक्रममा फलफूल तथा अन्य प्रजातिका बिरुवा गरी करिब ७५ सय वटा र श्रीलंका टप्पु क्षेत्रमा ६ हजार गरी करिब १३ हजार ५ सय वटा बिरुवा रोपिएको सेनाको पूर्वी पृतनाले जनाएको छ ।
प्रधानसेनापति पूर्णचन्द्र थापा, १ नं. प्रदेशका वनमन्त्री जगदीश कुसियत, पूर्वी पृतनापति उपरथी अनन्त कार्कीलगायत ५ सय जनाको उपस्थितिमा भएको वृक्षरोपणमा मध्यवर्ती इलाकास्थित १३ बिघामध्ये ११ विगाह क्षेत्रमा विभिन्न ७ प्रजातिका फलफूल र २ बिगाह क्षेत्रमा अन्य आयमूलक जातका बिरुवाहरु आँप, कटहर, अम्बा, कागती, बेल, गुलमोहर, जातलगायतका बिरुवाहरु रोपिएको जनाइएको छ ।
नेपाली सेनाले चलाएको ‘गो ग्रिन’ अभियान अन्तर्गत आइतबारनै २१ नं. बाहिनी अड्डा तोपगाडी ब्यारेकमा समेत ७ हजार ५० वटा बिरुवा रोपिएका छन् ।
