५ कात्तिक, काठमाण्डौ ।
नेपालमा पहिलो पटक चार वटा विद्युतीय बस सञ्चालन गरेको सुन्दर यातायातले यही वर्षभित्रै २५ बस थप गर्ने भएको छ ।
गत महिना सुरु भएको बस नाफामा गएकाले बस थप्ने योजना बनाइएको हो । डिजेलबाट चल्ने बस औसत छ पटक चक्रपथ घुम्दा दैनिक चार हजार रुपैयाँसम्मको इन्धन खर्च हुन्छ । विद्युत्मा भने औसत ७५० रुपैयाँ खर्च हुने बताइएको छ ।
गत महिनादेखि चक्रपथमा चार वटा बस सञ्चालन गरिरहेको कम्पनीले बस थप्ने योजना बनाएको हो । अहिले चक्रपथमा मात्रै बस सञ्चालन भइरहेकामा नयाँ भित्रिने बस नगरकाभित्र भागमा र उपत्यका बाहिरसमेत सञ्चालन गर्ने योजना रहेको प्रालिका अध्यक्ष भेषबहादुर थापाले बताए।
उनले २५ बस प्रदेश नं १ र ५ मा सञ्चालन हुने बताए। प्रदेश नं ५ मा बुटवल–नेपालगञ्ज र प्रदेश नं १ मा काकडभिट्टा–विराटनगर बस सञ्चालन हुने उनले जानकारी दिए। ‘प्रदेश नं १ मा मुख्यमन्त्री पनि विद्युतीय बस सञ्चालनमा उत्सुक रहेका भन्दै उनले प्रदेश सरकारसँगको सहकार्यमा आगामी तीन महिनामा बस सञ्चालन हुने बताएका हुन् ।
अहिले सञ्चालन भएका र निर्माण भइरहेका बस डिजाइनमा नेपाली प्राविधिक संलग्न रहेका अध्यक्ष थापाले जानकारी दिए । युरोपमा चल्ने जस्तो नभइ यहाँको सडक सुहाउँदो बस डिजाइन भएको उनले उल्लेख गरे।
बस काठमाडौँका अहिलेका सडकमा गुड्न उपयुक्त रहेको उनले बताए।(रासस)
