९ कात्तिक, चितवन ।
९ कात्तिक, चितवन । भरतपुर महानगरपालिकालाई सहयोगापेक्षी सडक मानवमुक्त महानगर घोषणा गरिएको छ । शनिबार भरतपुरमा एक कार्यक्रम गरी भरतपुरलाई देशकै पहिलो सडक मानवमुक्त महानगरका घोषणा गरिएको हो ।
कार्यक्रममा प्रदेश ३ का मुख्यमन्त्री डोरमणि पौडेलले घोषणा प्रतिवद्धता पत्र पढेर सुनाएका थिए भने भरतपुरकी मेयर रेनु दाहालले सामूहिक प्रतिवद्धता गराएकी थिइन् ।
मेयर दाहालले भरतपुरमा कोही पनि नागरिक गाँस, बास र कपासका लागि भौतारिने अवस्था अन्त्य गर्ने अभियान अन्तर्गत यो घोषणा गरिएको बताइन् । प्रदेश ३ का मुख्यमन्त्री पौडेलले देशका सबै स्थानीय तहले सडक मानवहरुको संरक्षणमा ध्यान दिनुपर्ने धारणा राखे ।
भरतपुरलाई सहयोगापेक्षी सडक मानवमुक्त महानगर बनाउन २७ असोजदेखि ८ कात्तिकसम्म हरेक दिन बेलुका ८ देखि ११ बजेसम्म सडकपेटी एवं सार्वजनिक स्थलमा उद्धार एवं परामर्श सेवा शुरु गरिएको थियो । यसक्रममा झण्डै तीन सय जनालाई उद्धार गरिएको थियो ।
उनीहरुमध्ये जम्मा आठ जना मात्रै वास्तविक अभिभावकविहीन र वेसहरा रहेको पाइएको छ । मानव सेवा आश्रमका केन्द्रीय अध्यक्ष रामजी अधिकारीका अनुसार कोही कुलतमा परेका, कोही दिनभर माग्ने र रातिमा रमाउनेहरु समते भेटिएका छन् ।
महानगरकी मेयर रेनु दाहालले सडकमा वास्तविक पीडितभन्दा कुलतमा परेकाहरुको जमात भेटिने गरेको बताइन् । सडकमा आएका र आउन सक्ने व्यक्तिहरुको खोजी तथा उद्धारका लागि भरतपुर महानगरपालिका, जिल्ला प्रशासन कार्यालय, जिल्ला प्रहरी कार्यालय र मानवसेवा आश्रमका वीचमा सम्झौता पनि गरिएको छ । हरेक हप्ताको एक दिन मानव सेवा आश्रमको पहल तथा भरतपुर महानगरपालिका र जिल्ला प्रहरी कार्यालयको व्यवस्थापनमा सहयोगापेक्षी मानवहरुको खोजी तथा परामर्श गरिने छ ।
सडकबाट ल्याइएका यस्ता सहयोगापेक्षीहरुको बस्ने व्यवस्थापन मानव सेवा आश्रमले गर्दै आएको छ । भरतपुरको वाइपास रोडमा रहेको आश्रमको घर भाडा भरतपुर महानगरपालिकाले तिर्ने घोषणा मेयर दाहालले गरिन् । साथै उद्धारका लागि जुट्न आवश्यक सवारी साधन खरिदको प्रकृयासमेत अघि बढाएको मेयर दाहालले बताइन् ।
हेटौडामा मुख्य कार्यालय रहेको आश्रमको देशभर १६ वटा जिल्लामा शाखाहरू छन् । २०७१ सालदेखि चितवनको सडकमा सहयोगापेक्षी सडकमानव मुक्त बनाउने अभियान शुरु गरेको यस संस्थाले हालसम्म ५०० जनाको उद्धार गरेको जनाएको छ । उनीहरुमध्ये ३०० जनालाई पुनःमिलन गराएको छ ।
मानव सेवा आश्रमकोप सहयोगमा यसअघि गोरखा नगरपालिका, मकवानपुर जिल्ला, पाल्पाको सिद्धबाबा मन्दिर क्षेत्र, बुटवलको सिद्धबाबाधाम क्षेत्र र काठमाडौँको पशुपति मन्दिर क्षेत्रलाई सहयोगापेक्षी सडक मानवमुक्त क्षेत्र घोषणा गरिएको छ ।
