११, कात्तिक, बैतडी ।
भारतको पिथौरागढमा बैतडीका तीन जना मजदुरको हत्या भएको छ ।
धारिलो हतियार प्रयोग गरी उनीहरुको हत्या गरिएको खबर प्राप्त भएको जिल्ला समन्वय समितिका उपप्रमुख धनबहादुर बोहराले बताए ।
पुर्चौंडी नगरपालिका वडा नम्बर–५, दहतालका ३६ वर्षीय हरे बोहरा र २७ वर्षीय बीरा बोहरा तथा पुर्चौंडी नगरपालिका–४, भटना तडीखेतका ३६ वर्षीय कासी बोहराको हत्या भएको हो ।
हत्या गरिएकामध्ये हरे बोहरा र बीरा बोहरा सहदोर दाजुभाइ हुन् । हत्या गरिएका तीनै जना डेढ बर्ष यतादेखि पिथौरागढको सिलौल मड भन्ने ठाउँमा मजदुरी गर्दै आइरहेका बुझिएको छ ।
उनीहरुमध्ये हरे बोहराकी श्रीमति किर्रा बोहरा फरार रहेकाले यो घटनामा उनको संलग्नता रहेको हुनसक्ने आशंका गरिएको पनि उपप्रमुख बोहराले बताए।
अहिले मृतकहरुको शव जिल्ला अस्पतालमा पिथौरागढ राखिएको र सोमबार बिहानै आफन्तहरु पिथौरागढ जाने तयारीमा रहेको उपप्रमुख बोहराले बताए ।
