मोरङ, कार्तिक ११ गते । मोरङको पथरी शनिश्चरे नगरपालिका ५ कोठेबारीमा आइतवार राती स्थानीय युवराज गिरीको घरमा आगलागी हुँदा आगोमा जलेर एक बालकको मृत्यु भएको छ ।
गिरीको घरमा साँझ दिपावली गर्न बालेको दियोबाट राती साढे १० बजे अचानक घरमा आगो सल्किदा घरभित्र सुतिरहेका गिरीका ४ बर्षीय छोरा युसन गिरीको आगोमा जलेर घटनास्थलमा नै मृत्यु भएको इलाका प्रहरी कार्यालय पथरीले जनाएको छ ।
आगलागीबाट गिरीको एक तले घर सहित ३ तोला सुन र ३ तोला चाँदीको गहना, अन्दाजी नगद ९५ हजारसहित घर भित्र रहेको सम्पूर्ण सरसामान जलेर नष्ट हुँदा अन्दाजी १२ लाख मूल्य बराबरको क्षति भएको प्रहरीको अनुमान छ ।
यस्तै मोरङको केरावारी गाउँपालिका ८ आमजुङे बस्ने उमेश बस्नेतको घरमा राती ९ बजे घरमा बालेको मैनबत्तीबाट आगलागी हुँदा २ तले घरसहित साढे ४ तोला सुनका गहना, नगद ४५ हजार र ग्वाली समेत जल्दा अन्दाजी २१ लाख मूल्य बराबरको क्षति भएको छ ।
उक्त आगलागी दमकल, इलाका प्रहरी कार्यालय बेलबारी,केरावारी र स्थानीयवासीले राती साढे ९ बजे नियन्त्रणमा लिइएको इलाका प्रहरी कार्यालय केरावारीले जनाएको छ ।
