१५ कात्तिक, काठमाडौं । प्रतिनिधिसभाका सदस्य सांसद राजेन्द्र गौतमको घरमा चोरी भएको छ ।
संखुवासभाबाट निर्वाचित सांसद गौतमको काठमाडौंस्थित निवासमा बिहीबार दिउँसै चोरी भएको हो । काठमाडौं महानगरपालिका वडा नम्बर १० देवीनगरस्थित गौतमको डेरामा बिहीबार दिउँसो चोरी भएको सांसद गौतमले जानकारी दिएका छन् ।
आफु बस्ने गरेको घर सूचना आयोगको कार्यालयको ठीक अगाडि रहेपनि त्यहाँ सिसिटीभी भए नभएको जानकारी नभएको उनले बताए । आफू सिंहदरबार गएको र पत्नी कार्यालय गएको बेला घरको मूल ढोकाको ताल्चा फुटाएर नगद र गरगहना चोरिएको उनले बताए ।
दिउँसो करिब दुईदेखि चार बजेको बीचमा चोरी भएको हुनसक्ने भन्दै गौतमले गरगहना र नगद गरी करिब तीन लाख जतिको चोरी भएको बताए ।
प्रहरीको केन्द्रीय अनुसन्धान ब्यूरो (सीआईबी) र तीनकुने प्रहरी वृत्तबाट आएको टोलीले घटनास्थलको अनुसन्धान गरे पनि चोरीमा संलग्न कसैलाई पनि पक्राउ परेको खबर नआएको उनले बताए । गौतम नेकपाका केन्द्रीय सदस्य एवं प्रेस संगठनको इञ्चार्ज हुन् ।
