१७ कात्तिक, काठमाडौं ।
मंसिर १४ गते हुने उपनिर्वाचनका लागि सत्तारुढ दल नेपाल कम्युनिस्ट पार्टी (नेकपा)ले उम्मेदवारहरुको टुंगो लगाएको छ । आइतबार साँझ बसेको सचिवालय बैठकले प्रतिनिधिसभा, प्रदेशसभा र स्थानीय तहका उम्मेदवारको टुंगो लगाएको हो ।
सचिवालय बैठकले कास्की क्षेत्र नम्बर–२ प्रतिनिधिसभा सदस्यको पदमा विद्या भट्टराईलाई उम्मेदवार बनाउने निर्णय गरेको छ । यस्तै बैठकले प्रदेशसभा सदस्यका लागि दाङ क्षेत्र नम्बर ३ (ख)मा विमला वली र भक्तपुर क्षेत्र नम्बर १ को (क)मा देवीप्रसाद ढकाललाई उम्मेदवार बनाउने निर्णय गरेको हो । प्रदेशसभा सदस्यका लागि ३ वटा ठाउँमा निर्वाचन हुने भए पनि नेकपाले बाग्लुङ क्षेत्रनम्बर २ को (ख)मा भने राष्ट्रिय जनमोर्चाका उम्मेदवारलाई समर्थन गर्ने निर्णय गरेको छ । यस्तै, धरान उपमहानगरपालिकाको प्रमुख(मेयर) का लागि प्रकाश राईलाई उम्मेदवार बनाउने निर्णय गरेको नेपाल कम्युनिस्ट पार्टी (नेकपा)का प्रवक्ता नारायण काजी श्रेष्ठले जानकारी दिए ।
बैठकले ३७ जिल्लाका विभिन्न रिक्त पदमध्ये प्रतिनिधिसभा सदस्य एक, प्रदेशसभा सदस्य तीन तथा स्थानीय तहका प्रमुख एक को नाम सचिवालय बैठकले टुङ्गो लगाए पनि गाउपालिका अध्यक्ष तीन, उपाध्यक्ष एक र वडाध्यक्ष ४३ जनाको नाम टुङ्गो लगाउने जिम्मा प्रदेश कमिटिलाई दिएको छ । मंसिर १४ गते विभिन्न ५२ पदको लागि उपनिर्वाचन हुदैछ ।
