२६ कात्तिक, विराटनगर ।
विराटनगरस्थित महेन्द्र मोरङ क्याम्पसका विद्यार्थीहरुले भारतीय प्रधानमन्त्री नरेन्द्र मोदीको पुत्ला दहन गरेका छन् । भारतले नेपाली भूमि मिचेर जारी गरेको नयाँ नक्साको विरोधमा उत्रिएका विद्यार्थीहरुले मोदीको पुत्ला दहन गरेका हुन् । तर, पुत्ला दहन गर्दैगर्दा प्रहरीले नियन्त्रणमा लिएर निभाएको थियो ।
मंगलबार स्वतस्फूर्त रुपमा सडकमा उत्रिएका विद्यार्थीहरुको र्याली नगरको विभिन्न भाग परिक्रमा गरी रोडशेष चौकमा गएर कोणसभामा परिणत भएको थियो भने महेन्द्र मोरङ क्याम्पसमा पुगेर अन्त्य भएको थियो । विरोधमा उत्रिएका विद्यार्थीहरुले विद्यार्थी एकता जिन्दावाद, भारतीय विस्तारवाद मुर्दावाद,गो ब्याक इन्डिया, कालापानी हाम्रो हो भन्दै भारतविरुद्ध नाराबाजी गरेका थिए ।
प्रदर्शनमा नेविसंघ, अनेरास्ववियू, अखिल क्रान्तिकारी, नयाँ शक्ति विद्यार्थी यूनियन लगायत अन्य विद्यार्थीसंगठनका साथै स्वतन्त्र विद्यार्थीहरुको सहभागिता रहेको विरोध कार्यक्रमका संयोजक विवेक आचार्यले जानकारी दिए । प्रर्दशनका क्रममा विद्यार्थी नेताहरु नविन पहाडी, अभिमन्यु यादव, कमल पोखरेल, जस्वन्त पौडेललगायतका विद्यार्थीहरुले लिपुलेक लिम्पियाधुरा जस्ता नेपाली भुभाग फिर्ता गराउन सम्पूर्ण नेपाली जनताहरु एकजुट हुनुपर्ने बताए । उनीहरुले सरकारले पहल नगरे सीमा रक्षाका लागि विद्यार्थी आन्दोलन देशैभरी फैलने पनि बताए ।
जम्मु–कश्मीरको विशेषधिकार खोसेर केन्द्र शाषित राज्यमा मिलाएपछि भारतले सार्वजनिक गरेको नयाँ नक्सामा लिपुलेकलगायतका नेपाली भूभाग समेटिएका छन । जसको यतिबेला देशभर तीव्र विरोध भइरहेको छ । नेपाल सरकारले भने भारतले एकतर्फीरुपमा जारी गरेको नयाँ नक्सा मान्य नहुने बताईसकेको छ । राजनीतिक तहमा पनि नेपाली भूभाग फर्काउन पहल गर्ने सहमति बनेको छ ।
