१६ मंसिर, काठमाडौँ ।
कुखुरा पालक किसानहरुले उत्पादन गरेको कुखुराले बजारमा राम्रो मूल्य नपाउँदा व्यवसाय बन्द गर्नुपर्ने अवस्थामा पुगेको बताएका छन् । नेपाल कुखुरा पालक किसान संघ र नेपाल कुखुरा बजार ब्यवस्थापन संघले सोमबार ललितपुरमा आयोजना गरेको एक कार्यक्रममा किसानहरुले बजारमा मूल्य नपाउँदा व्यवसाय नै बन्द गर्नुपर्ने अवस्थामा पुगेको बताएका हुन् ।
नेपाल कुखुरा पालक किसान संघका अध्यक्ष झनक पौडेलले सरकारले बेवास्ता गरेका कारण कुखुराको चल्ला र दानाको भाउ बढेको र तयारी कुखुराको भाउ घटेको गुनासो गरे । उनले कुखुराको दानामा कृत्रिम मूल्यवृद्धि हुँदा किसानको लागत बढेको उल्लेख गर्दै सरकारले किसानका समस्यालाई सम्बोधन गर्न नसकेको गुनासो गरे । उनले तयारी कुखुराको मूल्य निर्धारण वैज्ञानिक विधिबाट हुनुपर्ने माग समेत गरे।
अध्यक्ष पौडेलले किसानले लागत मूल्यको आधारमा निश्चित नाफा पाउनुपर्ने माग समेत गरे । कार्यक्रममा किसानहरुले बजारका व्यापारी र दाना उद्योगीहरुको बदमासिका कारण आफुहरु चेपुवामा परेको बताएका छन् । त्यस्तै किसानले उत्पादन गरेको कुखुराको मूल्य आफैले तोक्न पाउनुपर्ने माग समेत उनीहरुको छ ।
कुखुरा पालक किसानहरुले कुखुराको दाना, चल्ला र औषधीको मूल्य बढेको, गुणस्तरहिन दाना उत्पादन हुने, सप्लार्यसले प्रयोग गर्ने ढककाँटा ठिक नहुने, किसानको बजारसम्म पहुँच नहुनु तथा लगानीको अभाव हुनु र मूल्य निर्धारण एवं अनुगमन प्रकृया वैज्ञानिक नभएको लगायतका समस्या रहेको बताएका छन् । त्यसको समाधानका लागि सरकार गम्भिर हुनुपर्ने किसानहरुको भनाई छ ।
