२८ मंसिर, विराटनगर ।
नेपाल भ्रमण वर्षको प्रभावकारी प्रवद्र्धनका लागि प्रदेश नं. १ सरकारले सद्भावनादूत नियुक्त गरेको छ । कीर्तिमानी आरोही, खेलाडी तथा कलाकारसहित नौ जनालाई पर्यटन सद्भावनादूत नियुक्त गरेको छ ।
शुक्रबार काठमाडौँमा आयोजित कार्यक्रममा नेपाल भ्रमण वर्ष २०२० अन्तर्गत एक नम्बर प्रदेशस्तरीय पर्यटन प्रवद्र्धन समितिलेसर्वोच्च सगरमाथाको २४ पटक आरोहण गरी विश्वकीर्तिमान कायम गरेका आरोही कामिरीता शेर्पा, अल्ट्रा धाविका मीरा राईसहित नौ जनालाई पर्यटन सद्भावना दूत नियुक्त गरेको हो । त्यस्तै सद्भावना दूत नियुक्त हुनेमा आरोही मिङ्मा शेर्पा, सानु शेर्पा, मिङ्मा ग्याबु शेर्पा, छाङ्दावा शेर्पा तथा कलाकार दीपाश्री निरौला, नेपालकै अग्ला राजन अधिकारी र पिङ्कीराज गरिया पनि रहेका छन् ।
उनीहरुलाई प्रदेश नं. १ का मुख्यमन्त्री शेरधन राईले पर्यटन सद्भावनादूतको प्रमाण–पत्र प्रदान गरेका हुन। सो अवसरमा बोल्दै मुख्यमन्त्री राईले प्रदेश १ लाई विश्वकै उत्कृष्ट गन्तव्य बनाउने अठोटका साथ प्रदेशस्तरीय पर्यटन गुरूयोजना बनाउने गृहकार्य गरिएको बताएका छन् ।
नेपाल भ्रमण वर्ष २०२० मा प्रदेश १ सरकारले पाँच लाख पर्यटक भित्र्याउने लक्ष्य लिएको प्रदेश १ का पर्यटनमन्त्री जगदीशप्रसाद कुशियतले बताए । संघीय सरकारका संस्कृति, पर्यटन तथा नागरिक उड्डयनमन्त्री योगेशकुमार भट्टराईले विकास र प्रवद्र्धनका लागि प्रदेश सरकारलाई आवश्यक सहयोग गर्ने प्रतिबद्धता जनाउँदै भ्रमण वर्ष २०२० सफल बनाउन सबैलाई सहयोग गर्न आग्रह गरे ।
