१ पुस, काठमाडौँ ।
सत्तारुढ नेपाल कम्युनिस्ट पार्टी (नेकपा)को जारी स्थायी कमिटी बैठकमा नेता घनश्याम भुसालले पार्टी पुनर्निर्माणको प्रस्ताव पेश गरेका छन् । मंगलबार पार्टी कार्यालय धुम्बाराहीमा बसेको बैठकमा स्थायी कमिटी सदस्य भुसालले लिखित प्रस्ताव नै पेश गरेका हुन् ।
उनले पार्टी एकता र सरकार गठनको दुई वर्ष सन्तोषजनक नभएको भन्दै नेतृत्वलाई धर्ती टेक्न आग्रह गरेका छन् । क्रान्तिले इतिहासको सबै गल्तीको हिसाब किताब चुक्ता नगर्ने बरु खाता मात्र खोल्ने भन्दै उनले यस कुरामा हाम्रा विगत दुईवर्ष सन्तोषजनक नरहेको बताए ।
उनले यी दुई वर्षलाई हेर्दा निर्वाचन जित्नु र बहुमतको सरकार बनाउनु नै सबैभन्दा ठूलो कुरा हो, सबै समस्याको समाधान हो भन्ने कोणबाट हामीले जनतालाई प्रशिक्षित गर्दैछौं भन्ने देखिएको बताए । राजनीतिक पार्टीहरु सत्तामा पुगेपछि जनतासँग आफैंले गरेका बाचाहरु कठिनतम परीक्षामा सामेल हुने भन्दै भुसालले नेकपा पनि त्यही परीक्षामा रहेको बताए ।
