३ पुस, काठमाडौं । उपसभामुख डा.शिवमाया तुम्बाहाम्फेकै अध्यक्षतामा प्रतिनिधिसभाको हिउँदे अधिवेशनको पहिलो बैठक सुरु हुने भएको छ ।
संसद बैठकको शुरुवात गरेर मात्र राजीनामा दिने तुम्बाहाम्फेको अडानमा नेकपा नेतृत्व सहमत भएपछि शुक्रबारको बैठक उपसभामुखकै अध्यक्षतामा शुरु हुने भएको हो । प्रतिनिधिसभा नियमावलीमा बैठकको सुरु र अन्त्य सभामुखले गर्ने भनिएको छ ।
सभामुख नभएको अवस्थामा उपसभामुखले गर्ने भन्न ेबारे नियमावली मौन रहेको छ । सभामुख र उपसभामुख दुवै नभएको अवस्थामा भने जेष्ठ सदस्यले अध्यक्षता गर्ने भनिएको छ । सत्तारुढ नेकपाले सभामुख निर्वाचनका लागि उपसभामुख तुम्बाहाम्फेलाई राजीनामा गर्न भनेको छ । उनले सभामुखमा दाबी गरिरहेकी छन् ।
पहिलो बैठकको शुरु गरेरमात्र राजीनामा दिने उनको चाहना अनुसार संसदीय दलका उपनेता सुवास नेम्वाङले सहजीकरण गरिदिएको नेकपा उच्च स्रोतले जनाएको छ ।
तुम्बाहाम्फेले बिधेयक प्रमाणिकरण बाहेक सभामुखले गर्ने सबै काम गर्न थाले पछि प्रमुख विपक्षी नेपाली कांग्रेसले बिरोध गरेको छ । सभामुखकै हैसियतामा उनले गरेको सूचना आयोगका पदाधिकारीको सिफारिसविरुद्ध सर्वोच्च अदालतमा रिटसमेत दायर भइसकेको छ ।
