३ पौष, कास्की । पोखरा प्रिमियर लिग क्रिकेट (पीपीएल) अन्तर्गत चितवन राइनोजले बुटवल ब्लास्टर्समाथि ११९ रनको फराकिलो जित हात पारेको छ । पारस खड्काको कप्तानीमा रहेको चितवनको प्रतियोगितामा लगातार दोस्रो जित हो ।
चितवनले दिएको ठूलो लक्ष्य पछ्याएको बुटवल १८ दशमलव ४ ओभरमा ८४ रनमै समेटियो । बुटवलका लागि मध्यक्रमका शिवम सिंह, भीम सार्की र हरिबहादुर चौहानबाहेक अन्यले दोहोरो अंकको रन बनाउन सकेनन् ।
सुरुवाती ब्याट्सम्यानहरु अफ्तावउद्दिन अहमद २, शंकर राना ५ र हर्ष टंक १ रनमा आउट भएका थिए । चौथो नम्बरमा आएका शिवम्ले ३३ बलमा १ चौका र ३ छक्काको सहयोगमा ३३ रन बनाएर विक्रम भुसालको बलमा आउट भए ।
पाँचौं नम्बरमा आएका भीम सार्कीले पनि विक्रम सोवको बलमा आउट हुनुअघि २१ ब्लमा २१ रन जोडे । कप्तान सोमपाल कार्मी ३, शेर मल्ल २ र हरिबहादुर चौहान १० रन बनाएर आउट भए ।
बलिङमा करण केसीले ४ विकेट लिए । उनले ४ ओभरमा १० रनमात्र खर्चिए । रोहन मुस्तफाले ३ ओभरमा ५ रन खर्चेर २ विकेट लिए । सन्नी पटेल, भुवन कार्की, विक्रम सोब र विक्रम भुसालले १–१ विकेट लिए ।
यसअघि पोखरा रंगशालामा टस हारेर पहिले ब्याटिङ गरेको चितवनले कप्तान पारस र रोहन मुस्तफाको सानदार अर्धशतकको सहयोगमा ३ विकेट गुमाएर २ सय ३ रनको योगफल खडा गरेको थियो । पीपीएल इतिहासमा एकै इनिङ्समा बनेको यो सर्बाधिक योगफल हो ।
चितवनका लागि ओपनिङमा आएका कप्तान पारस र रोहनले १ सय १७ रनको शतकीय साझेदारी गरेसँगै चितवन ठूलो योगफलतर्फ अघि बढेको थियो । ११ दशमलव ३ ओभरमा कप्तान पारस खड्का ६३ रनको स्कोरमा अफ्तावउद्दिन अहमदको बलमा सोमपाल कामीको हातबाट क्याचआउट भए । उनले ४० बलमा ६ चौका र २ छक्का प्रहार गरे ।
तेस्रो नम्बरमा आएका बाबर हायत १ रन बनाएर आउट भए । उनलाई पनि अहमदले नै बोल्ड गरेका हुन् । त्यसपछि आएका आरिफ शेखसँग मिलेर रोहनले ६५ रनको अर्धसतकीय साझेदारी गरे ।
अन्तिम ओभरको तेस्रो बलमा अविनाश बोहोराको बलमा क्याचआउट हुनुअघि आरिफले १९ बलमा ३ चौका र ३ छक्काको सहयोगमा ४० रन प्रहार गरे । रोहन ७० रनमा अविजित रहे । उनले ५६ बलमा ७ चौका र २ छक्का प्रहार गरे ।
