६ पौष, दैलेख । विप्लव नेतृत्वको नेकपा कार्यकर्ताले दैलेखबाट अपहरण गरेका गाउँपालिका दम्पतीमध्ये इला शाही सम्पर्कमा आएकी छन् ।
इलाले कालीकोटबाट फोन गरेको तर उनले आफूलाई नेकपाले नछोडेको बताएकी आफन्तले बताएका छन् । उनले आफू कालीकोटको सिमाना नजिक भर्ता लेकको आसपासमा रहेको पनि जानकारी गराएकी छन् ।
उनका श्रीमान् ठाँटीकाँध गाउँपालिकाका अध्यक्ष धीरबहादुर शाहीको अवस्था भने अझै थाहा हुन नसकेको प्रहरीले जनाएको छ । शाही दम्पतीसहित धीरबहादुर शाहीका भाइ हस्तबहादुरलाई विप्लव नेतृत्वको नेकपाका कार्यकर्ताले शनिबार बेलुका अपहरण गरेर एक घण्टापछि छोडेका थिए ।
भाइलाई हिजै बेलुका छाडेपनि दुई जनालाई भने अहिलेसम्म नछोडेको दैलखेका सहायक प्रमुख जिल्ला अधिकारी इन्द्रबहादुर क्षत्रीले जानकारी दिए । इला कृष्ण माध्यमिक विद्यालयको प्रधानाध्यापक हुन् ।
अपहरणमा परेका शाही दम्पतीको खोजी भइरहेको प्रहरीले जनाएको छ । गाउँपालिकाको बजेट दुरुपयोग गरेको भन्दै अध्यक्ष शाहीलाई विप्लब नेतृत्वको नेकपाले पहिला पनि चेतावनी पत्र दिएको थियो ।
