६ पुस, सुनसरी ।
सुनसरीको बराहक्षेत्र–५ भरौलबाट द्वन्दकालमा माओवादी लडाकुले लुकाएर राखेको हतियार र गोली नेपाली सेनाले बरामद गरेको छ । सुनसरी प्रहरीले बराहक्षेत्र नगरपालिका–५ एकताटोलस्थित खेम प्रधानको कुखुरा फार्मबाट (सबमेसिन गन), त्यसमा प्रयोग हुने गोली र एक बोरा विस्फोटक पदार्थ फेला पारेको हो ।
फार्मको जग मुनि लुकाएर राखेको अवस्थामा आइतबार एसएमजी र त्यसमा प्रयोग हुने गोली ९ हजार ९ सय ८२ थान फेला परेको सुनसरीका प्रहरी उपरिक्षक (एसपी) यज्ञविनोद पोखरेलले जानकारी दिए । गोप्य सूचनाको आधारमा प्रधानको कुखुरा फार्म खानतलासी गर्दा एसएमजी, गोली र विस्फोटक पदार्थ फेला परेको उनले बताए । हतियार र गोली पहिला नै गाडेर राखिएको जस्तो देखिएका एसपी पोखरेलले बताए। अहिले अत्याधुनिक हतियार, गोली र विस्फोटक पदार्थ बरामद भएको स्थल आसपास सेना, सशस्त्र प्रहरी र नेपाल प्रहरी परिचालन गरिएको छ ।
धरान उपमहानगरपालिकासँग सिमाना जोडिएको बराहक्षेत्र–५ साविक भरौल गाविसमा पर्दछ । कुखुरा फार्म संचालक प्रधान द्वन्द्वकालमा माओवादीका कार्यकर्ता रहेको गाउँलेहरुले बताएका छन । प्रहरीले ती हतियार कसले र कहिले लुकाएको भन्ने प्रष्ट पारेको छैन । कुखुराको खोरमुनी २० लिटरको प्लाष्टिकको ड्रममा प्याक गरेर राखिएको अवस्थामा गोलीहरु बरामद भएका थिए ।
हतियार तथा विष्फोटक पदार्थ बरामद भएपनि अहिलेसम्म प्रहरीले कसैलाई पक्राउ गरेको छैन । जग्गाधनी खेम प्रधान सशस्त्र द्वन्दकालमा माओवादी कार्यकर्ता थिए । उनी अहिले राजनीतिमा निष्कृय छन् । प्रधान शान्ति प्रकृयाको केही समय राजनीतिमा सकृय भएपनि पछिल्लो समय निष्कृय जस्तै रहेको बराहक्षेत्र नगरपालिकाका मेयर निलम खनालले बताउनुभयो । प्रधान २०६७ सालमा घरैमा कुखुरा फारम खोलेर त्यसमै व्यस्त थिए । तर पछिल्लो समय उक्त खोरमा कुखुरा नहाली खालि राखिएको थियो ।
