२० पुस, विराटनगर । पछिल्ला समय मोरङमा मोटरसाईकल चोरीका घटना बढिरहेको बेला मोरङ प्रहरीले चोरी भएका ८ थान निजि सवारी साधन विभिन्न स्थानबाट बरामद गरेको छ ।
गत पुस ११ गते चोरी भएको स्थानीय दिपेन्द्र राईको नाममा दर्ता भएको को १४ प ८४४९ नम्वरको स्कुटर पुस १३ सुन्दरहरैचाका सन्तोष खत्रीको साथबाट बरामद गरिएको बेलबारीमा पत्रकार सम्मेलन गर्दे प्रहरीले जानकारी दिएको छ । बेलबारीका प्रहरी प्रमुख इन्स्पेक्टर गुणराज लोहनीका अनुसार खत्रीकै सूचनाको आधारमा केरावारी गाउँपालिका वडा नं ७ का महेश्वर मगरको गोठमा लुकाई राखेको अवस्थामा २२० सि.सि.को पल्सर मोटरसाइकल र पार्टपुर्जा बरामद भएको छ ।
त्यस्तै केरावारी निवासी तुलसी मगरको ग्वालीभित्र लुकाइ राखेको अवस्थामा १ थान मोटरसाइकल, पाटपुर्जा, इन्जिन एक थान समेत गरी जम्मा ४ थान मोटरसाइकल बरामद गरी थप अनुशन्धान भैरहेको जिल्ला प्रहरी कार्यालय मोरङका एसपी विश्व अधिकारीले जानकारी दिए ।
त्यसैगरी सुन्दर हरैचा ५ का संगम गुरुङको घरबाट चोरी भएको पल्सर मोटरसाइकल सहित सुन्दरहरैचा ७ का निश्चल श्रेष्ठ र रोजिस राई पक्राउ परेका छन् । उनीहरुको साथबाट चोरी भएको २ थान मोटरसाइकल पनि फेला परेको छ । त्यस्तै विभिन्न स्थानबाट हराएका मोवाइल समेत बरामद गरी प्रहरीले मोबाईल धनीलाई बुझाएको छ ।
पत्रकार सम्मेलनमा एसपी अधिकारीले पछिल्लो समय मोरङमा सुरक्षा व्यवस्था थप कडा पारिएको बताए । उनले चोरी, डकैती, अवैद्य कारोवार लगायत हरेक आपराधिक क्रियाकलापहरुलाई निर्मूल पार्न मोरङ प्रहरी सक्रिय रहेको समेत बताएका छन् ।
