२९ पौष, काठमाडौं । ललितपुरबाट एकजना पास्टरलाई ललितपुर प्रहरीले पक्राउ गरेको छ । महिलालाई जबरजस्ती करणी गरेको जाहेरी परेपछि प्रहरीले अनुसन्धानका लागि पास्टर ध्रुवबाबु जोशीलाई सोमबार साँझ कुसुन्तीबाट नियन्त्रणमा लिएको हो ।
महानगरीय प्रहरी परिसर ललितपुरकी प्रवक्ता एसपी दुर्गा सिंहका अनुसार पक्राउ परेका जोशीलाई मंगलबार म्याद थप गरी अनुसन्धान गरिनेछ ।
जोशीमाथि तीन महिनादेखि एक महिलालाई जबरजस्ती करणी गर्दै आएको आरोप छ । खुट्टा काम्ने रोगबाट पीडित ती महिलालाई निको बनाइदिने भन्दै जोशीले करणी गरेका थिए ।
उनी रोग निको हुने भन्दै ललितपुरको मण्डली चर्चमा प्रार्थनाका लागि जाने गर्थिन्। ती महिलाको उजुरीमा जोशीले चापागाउँको एक गेष्ट हाउसमा बोलाएर जबरजस्ती करणी गरेको पनि उल्लेख छ ।
करणी गरेको कसैलाई भने परमेश्वरले दिएको शक्ति नाश भई जाने त्रास जोशीले महिलालाई देखाउँदै आएका थिए । पछिल्लो पटक जोशीले आफूले सञ्चालन गर्दै आएको पसलमा पुगेर जबरजस्ती गरेको ती महिलाले उल्लेख गरेकी छन् ।
गोरखा बजार घर भएका जोशी घरमा भने केही वर्षदेखि सम्पर्क्विहीन थिए । उनी पहिले स्थानीय महेन्द्रज्योति माध्यामिक विद्यालयका विद्यालय व्यवस्थापन समिति अध्यक्ष भए। उनले घरमै पार्टी प्यालेससहित रेष्टुरेन्ट पनि चलाएका थिए ।
केही वर्षअघि उनकी सालीले जोशीसँगको सम्बन्धका कारण झुन्डिएर आत्महत्या गरेकी थिइन् । सालीले घरमै आत्महत्या गरेपछि जोशीले गोरखा छाडेका थिए । त्यसयता उनी सम्पर्कविहीन थिए ।
