५ माघ, विराटनगर ।
विराटनगरमा निर्माण भएको एकीकृत जाँच भन्सार बिन्दु (आईसीपी)को प्रधानमन्त्री केपी शर्मा ओली र भारतीय समकक्षी नरेन्द्र मोदीले संयुक्त रूपमा उद्घाटन गर्ने भएका छन् ।
माघ ७ गते प्रधानमन्त्रीद्वय ओली र मोदीले संयुक्त रूपमा उक्त आईसीपीको डिजिटल (भिडियो कन्फ्रेन्स)मार्फत स्वीच थिचेर उद्घाटन गर्ने भएका हुन् ।
प्रधानमन्त्री ओली सिंहदरबारबाट र मोदी दिल्लीबाट भिडियो कन्फरेन्समा जोडिने तयारी भएको सहरी विकास तथा भवन निर्माण विभागका राजु शर्माले जानकारी दिए।
१ सय २९ बिघामा फैलिएको आईसीपी १ अर्ब १४ करोड भारतीय रुपैयाँको लागतमा निर्माण भएको हो । केन्द्र सञ्चालन भएपछि नेपाली व्यवसायीलाई केही सहज हुने यहाँका उद्योगी व्यापारीको विश्वास छ ।
उद्घाटनका क्रममा भारतीय सहयोगमा निर्माण भएका भूकम्प प्रतिरोधी घरसमेत हस्तान्तरण हुने कार्यक्रम रहेको राष्ट्रिय छ । भारतीय सहयोगमा गोरखामा २७ हजार घर पुनर्निर्माण भएका छन् । भारतले नुवाकोट र गोरखामा गरी ५० हजार निजी आवास निर्माणमा सहयोग गरेको प्राधिकरणले जनाएको छ ।
