६ माघ, काठमाडौं । कतार एअरवेज सहिद स्मारक ए डिभिजन लिगमा विभागीय टोली त्रिभुवन आर्मी क्लब शीर्षस्थानमा उक्लिन सफल भएको छ ।
दशरथ रंगशालामा सोमबार भएको खेलमा आर्मीले च्यासल युवा क्लबलाई ३-० गोल अन्तरले पराजित गर्यो । खेलको पहिलो हाफमा दुवै टोलीले केहि अवसर सिर्जना गरेपनि अग्रता लिन भने असमर्थ रहे । दोस्रो हाफको ५८ औं मिनेटमा कप्तान भरत खवासले उत्कृष्ट गोल गर्दै आर्मीलाई अग्रता दिलाए ।
मिडफिल्डबाट सेसेहाङ आङदेम्बेले दिएको थ्रु पासमा भरतले पेनाल्टी क्षेत्रको बाँया भागबाट गरेको शक्तिशाली प्रहार च्यासलका गोलरक्षक एलन न्यौपानेले बचाउन सकेनन् ।
आर्मीका लागि ७३ औं मिनेटमा फरवार्ड नवयुग श्रेष्ठले अग्रता दोब्बर पारे । च्यासलको कर्नर विफल भएपछि अगाडि बढेको आर्मीको काउन्टर अट्याकमा विकास खवासको वन भर्सेस वनको प्रहारलाई एलनले बचाए । तर त्यसको रिबाउन्डमा अनमार्क रहेका नवयुगले पेनाल्टी क्षेत्रभित्र सहजै गोल गरे ।
खेलको ५ मिनेट समय बाँकी रहँदा आर्मीले अर्को गोल थप्दै जित पक्का गर्यो । पेनाल्टीमा सन्तोष तामाङले गोल गर्दै आर्मीका लागि महत्त्वपूर्ण तीन अंक सुनिश्चित गरे ।
पेनाल्टी क्षेत्रभित्र छिरिङ गुरुङले नवयुगलाई लडाएपछि प्राप्त पेनाल्टीमा सन्तोषले गोल गरेका थिए । इन्ज्युरी समयमा आर्मीले अग्रता बढाउने अर्को अवसर पायो । तर नवयुगको पेनाल्टी प्रहार गोलमा परिणत हुन सकेन ।
यस जितसँगै आर्मीले अंक तालिकाको शीर्ष स्थानमा उक्लँदै ३ अंकको अग्रता बनाएको छ । आर्मीले ७ खेलमा ५ जित, १ बराबरी र १ हारसँगै १६ अंक बनाएको छ । दोस्रो स्थानको मनाङ र तेस्रो स्थानको मछिन्द्रको समान १३(१३ अंक रहेको छ ।
यता, च्यासल भने ७ खेलमा १ जित, ३ बराबरी र ३ हारसँगै ६ अंकसाथ १२ औं स्थानमा नै अड्किएको छ ।
