१९ माघ, विराटनगर ।
झापा विर्तामोडका २० वर्षिय अभिषेक कटवालको हत्यामा संलग्न भएको आरोपमासुनसरी प्रहरीले दुई जनालाई पक्राउ गरेको छ । हत्यामा संलग्न भएको आरोपमा प्रहरीले विजय कार्की र अर्जुन कार्कीलाई पक्राउ गरेको हो ।
गत मंगलबार बिहान विराटनगर महानगरपालिका–४ र सुनसरीको दुहबी नगरपालिका– १२ सीमाना भएर बग्ने केशलिया खोलाको सुनसरी तर्फ बालुवा र परालले छोपेको अवस्थामा कटवालको शव फेला परेको थियो ।
विभत्स अवस्थामा शव भेटेको प्रहरीले अनुसन्धानका क्रममा उनीहरुलाई पक्राउ गरेको हो । पक्राउ परेका मध्ये एकलाई विराटनगर र एकलाई बेलबारी नगरपालिकाको बाहुनी क्षेत्रबाट पक्राउ गरेको सुनसरी प्रहरीले जनाएको छ ।
सुनसरीका प्रवक्ता प्रहरी नायव उपरीक्षक विनोद शर्माका अनुसार प्रहरीले पक्राउ परेका दुईजना लागूऔषध प्रयोगकर्ता रहेको बताएको छ । मृतक पनि लागूऔषध प्रयोगकर्ता भएको प्रहरी स्रोतले जानकारी दिएको छ ।
पक्राउ परेकाहरुलाई आइतबार दिउँसो म्याद थप गरी अनुसन्धान अघि बढाउने शर्माले जानकारी दिए । पक्राउ परेका विजयले मृतकको जुत्ता र स्कुटर लगेका थिए भने अर्जुनले ज्याकेट लिएर गएका थिए । शनिबार विजयलाई लागूऔषध सेवन गरेकै अवस्थामा प्रहरीले बाहुनीबाट पक्राउ गरेको थियो ।
प्रहरीका अनुसार मामाघर बस्दै आएका युवक माघ ९ गते मे १० प ८६७५ नम्बरको स्कुटरमा घुम्न निस्किएका थिए । विराटनगर आएका उनी विजय र अर्जुनसँग जोगवनी बजार पुगेका थिए । घटना सोही दिन भएको प्रहरीले जनाएको छ । घरबाट निस्किएको चार दिनसम्म अभिषेक घर नफर्किएपछि उनका आफन्तले गत सोमबार इलाका प्रहरी कार्यालय बिर्तामोडमा खोजी दिन निवेदन दायर गरेका थिए ।
