२६ माघ, विराटनगर ।
मोरङ रंगेली नगरपालिका वडा नम्बर ७ मा रहेको संसारी माईस्थान मन्दिरमा चोरी गर्ने एक जनालाई प्रहरीले पक्राउ गरेको हो । प्रदेश १ सरकारले समेत धार्मिक स्थलको सुचीमा राखेको सो मन्दिरमा रहेको संसारीमाताको मुर्तिको टाउकोमा लगाउने चाँदीको मुकुट, छत्र, त्रिशुल, सिक्री, पित्तलको गणेश मुर्ती र छोटी माताको पुरानो मुर्ती लगायत ११ लाख ३५ हजार बराबरको सामाग्री चोरी गर्ने रंगेली–३ वस्ने भुवन पराजुलीलाई आइतबार जिल्ला प्रहरी कार्यालय मोरङले पत्रकार सम्मेलन गरी सार्वजनिक गरेको हो ।
पराजुलीले गत बुधबार राती करिब १२ बजे कपडाले अनुहार छोपी माथितिर रहेको पर्खालबाट हामफाली मन्दिरमा छिरेर चोरी गरेका थिए । बिहीबार प्रहरीलाई सुचना प्राप्त हुनसाथ ईलाका प्रहरी कार्यालय रंगेलीवाट प्रहरी निरीक्षक लेखनाथ दाहालको कमाण्डमा खटिएको प्रहरी टोलीले अनुसन्धान सुरु गरेको थियो ।
अनुसन्धानका क्रममा मंन्दिरमा जडान गरेको सिसि क्यामेरा फुटेज तथा अन्य प्राविधिक प्रविधी प्रयोग गरी चोरी गर्ने मानिसलाई पत्ता लगाउने क्रममा प्रहरीले चोरीमा प्रयोग भएको मोटरसाइकल नम्बर पत्ता लगाएको थियो । प्रहरीले चोरीमा प्रयोग भएको ज १२ प ५४६८ नम्वरको मोटरसाईकल रंगेली – ३ वस्ने भुवन पराजुलीको घर आगनमा पार्किङ गरी राखेको अवस्थामा फेला पारी उनको घरमा खानतलासी गर्दा चोरी भएका सामान फेला परेको जिल्ला प्रहरी कार्यालय मोरङका प्रमुख एसपी विश्व अधिकारीले जानकारी दिए ।
उनको घरको सुत्ने काठको लोवेडको मुनी हरियो रंगको कोट कभरमा चेन लगाई पोका पारी लुकाएर राखेको अवस्थामा चोरी गरेको सामाग्री फेला परेको थियो । सो स्थानबाट मोटरसाइकल सहित पराजुलीलाई पक्राउ गरी फेला परेका संसारीमाताको मुर्तीको टाउकोमा लगाउने चाँदीको मुकुट १ थान १, छत्र १थान, त्रिशुल १ थान, र पित्तलको गणेश र छोटीमाताको पुरानो मुर्ति २ थान, पित्तल र फलामको त्रिशुल २ थान , चोरी गर्दा लगाएको रातो रंगको उनिको टोपी, झोला, पञ्जा, पत्लो ज्याकेट, जिन्स पेन्ट लगायत बरामद गरिएको एसपी अधिकारीले बताए । बरामद हुन बाँकी चाँदीको जस्तो देखिने ३ वटा सिक्री शनिबार बरामद गरिएको उनले बताए ।
