२७ माघ, राजविराज ।
आफ्ना निर्दोष कार्यकर्तालाई झुठा मुद्दा लगाई पक्राउ गरिएको भन्दै सोमबार नेपाली कांग्रेस सप्तरीले राजविराजमा विरोध प्रदर्शन गरेको छ । केपी ओलीको पाराले, दुख पाए साराले नारा लगाउदै जनसागर उत्रिएको छ ।
नेपाली कांग्रेस सप्तरीका सभापति दिनेशकुमार यादवको अगुवाईमा राज रंगशालाबाट निस्केको जुलुस पक्राउ परेका कार्यकर्ताको रिहाई माग गर्दे बजार क्षेत्रमा प्रदर्शन पश्चात् नेता चौकमा कोणसभामा परिणत भएको थियो ।
माघ २१ मा डाक्नेश्वरी नगरपालिकाका प्रमुख शिवनारायण साह सहित केही कर्मचारी माथि हातपात गरेको आरोपमा प्रहरीले सोही नगरपालिकाका निवासी अमरेन्द्रकुमार यादव, अर्जुनकुमार यादव र राजिवकुमार रायलाई पक्राउ गरेको थियो । उनीहरुमाथि अमानविय व्यवहार अन्तर्गत मुद्दा चलाइएको प्रहरीको भनाई छ ।
कांग्रेस सप्तरीका सभापति दिनेश यादवले पक्राउ परेका आफ्ना कार्यकर्तालाई झुठा मुद्दा लगाइएको दावी गर्दै रिहा नगरिए आन्दोलन चर्काउने चेतावनी दिइएको छन् । उनले डाक्नेश्वरी नगरपालिकाका प्रमुख साहलाई भेट्न जाँदा उपप्रमुखका पति ओम प्रकाश यादवले आफ्ना कार्यकर्ता माथि दुव्र्यवहार गरेको तथा फसाउने नियतले उल्टै प्रहरीमा झुठो उजुरी दिएको दावी गरे ।
