२७ माघ, काठमाडौँ ।
सत्तारुढ दल नेपाल कम्युनिष्ट पार्टी (नेकपा)का अध्यक्ष पुष्पकमल दाहालले मुलुक समाजवादको युगतर्फ अगाडी बढेको भएपनि सबैको भाव र चाहानाहरु समेट्न नसकिएको स्वीकार गरेका छन् । काठमाडौंमा भएको एफ. एल. एफ. अवार्ड कार्यक्रममा सम्बोधन गर्दै दाहालले नयाँ व्यवस्था ल्याउन सबै जातजाति, भाषाभाषी र संस्कृतिका समूदायको योगदान बराबर भएपनि अझै सबैको भाव र चाहाना समेट्न नसकिएको स्वीकार गरेका हुन् ।
देश संघीय लोकतान्त्रीक गणतन्त्रको युगमा भएपनि संविधानमा अझै समानता, समावेशीताका कुराहरु पुरा हुन नसकेको उल्लेख गर्दै दाहालले भने, ‘‘संघीय लोकतान्त्रिक गणतन्त्रको युगमा हामी छौँ । यो संघीय लोकतान्त्रिक गणतन्त्रमा धर्म निरपेक्षता, समावेशीता, समानुपातिकताको जुन स्तरमा हामी आइपुगेका छौँ । यद्यपी सबैको भावहरु सबैका चाहानाहरु त्यसमा समेटी सके, पूर्ण भइसक्यो भन्ने दाबी हाम्रो छैन । हाम्रो संविधानले पनि यसको परिमार्जनको यसको विकासको आवश्यकता स्वीकार गरेको छ । तर पनि फेरी एउटा सामन्तीवादी युगबाट अर्को एउटा समाजवादको युगतिर जाने प्रकृयामा हामी छौँ ।’’
अध्यक्ष दाहालले देशमा राजनीतिक परिवर्तन ल्याउन सबै जातजाति, भाषाभाषी, सांस्कृतिक समूदायको उत्तिकै योगदान हुनु खुसी र गौरबको कुरा भएको बताए । विश्वमा अहिलेसम्म सगरमाथाको देश, वुद्ध जन्मेको देश भनेर चिनिने गरेकोमा अब विकास र समृद्धि, समाजवाद र सामाजिक न्यायको यात्रामा पनि नेपाललाई उचो ठाउँमा पु¥याउन सम्भव रहेको बताए ।
