४ फागुन, काठमाडौं ।
काठमाडौंको गोंगबु नयाँ बसपार्कक्षेत्रबाट अवैध कार्यमा संलग्न ५७ जनालाई प्रहरीले नियन्त्रणमा लिएको छ ।
नयाँ बसपार्क शुद्धीकरण अभियानअन्तर्गत सञ्चालित स्विप अपरेसनका क्रममा गएराति ५७ जनालाई नियन्त्रणमा लिएको महानगरीय प्रहरी वृत्त, महाराजगञ्जले जनाएको छ ।
पक्राउ परेका ५७ जनालाई महानगरीय प्रहरी वृत्त, महाराजगञ्जमा राखेर अनुसन्धान भइरहेको वृत्तका डीएसपी उमेश लम्सालले जानकारी दिए । पक्राउ पर्नेमा जबरजस्ती करणीका फरार अभियुक्त सनकाजी दर्जी पनि रहेका छन् ।
गोंगबु नयाँ बसपार्क क्षेत्रभित्र हुने अनाधिकृत कार्य रोक्न प्रहरीले पछिल्लो पटक शुद्धीकरण अभियान चलाएको छ । जसअन्तर्गत यसअघि दर्जनौं पक्राउ परिसकेका छन् ।
अपरेसनका क्रममा प्रहरीले १ सय लिटर अवैध घरेलु मदिरा पनि नष्ट गरेको छ ।
