७ फागुन,काठमाडौं ।
परराष्ट्रमन्त्री प्रदीप ज्ञवालीले गत साउनमै संसदमा सरकारले अमेरिकी सहयोग नियोग मिलेनियम च्यालेन्ज कर्पोरेसन (एमसीसी) पारित गर्ने प्रस्ताव पेश गरिसकेकाले सरकारको दृष्टिकोण प्रष्ट रहेको बताएका छन् ।
बंगलादेशको औपचारिक भ्रमणबाट फर्किने क्रममा त्रिभुवन अन्तर्राष्ट्रिय विमानस्थलमा पत्रकारहरुसँग कुरा गर्दै मन्त्री ज्ञवालील एमसीसीबारे सरकारको दृष्टिकोण प्रष्ट रहेको र नेकपाको कार्यदलले यसबारे अध्ययन गर्नेमात्र म्याण्डेट पाएको बताएका हुन् ।
उनले भने ‘हाम्रो पार्टीको बैठकमा समूहगत छलफलमा कतिपय साथीहरुले हामीले बुझनौं,अन्यौल भयो भनेपछि यसबारे अध्ययन गर्ने भनेर कार्यदल बनेको हो । हाम्रो म्याण्डेट पनि त्यतिनै हो । दोस्रोपटक म्याद थप भएको अवधिभित्रै चाँडैनै हाम्रो प्रतिवेदन बुझाउछौं ।’
नेकपा केन्द्रीय कमिटीबाट एमसीसी अध्ययन गर्न गठित झलनाथ खनाल नेतृत्वको कार्यदलमा स्थायी कमिटी सदस्य भीम रावल र मन्त्री ज्ञवाली सदस्य छन् । कार्यदलको बैठक बिहीबार बस्ने उनले जानकारी दिए ।
अर्को प्रसंगमा मन्त्री ज्ञवालीले नेपालले आयोजना गर्न लागेको सगरमाथा संवादका लागि सहभागिताको सुनिश्चितता भइसकेको र कतिपयसँग सहभागिताको लागि कुराकानी भइरहेको बताउँदै चीनमा फैलिएको कोरोना भाइरसको कारण सगरमाथा संवाद प्रभावित नहुने बताए ।
बंगलादेशका विदेशमन्त्री डा.एके अब्दुल मोमेनको निमन्त्रणमा फागुन ५ देखि ७ गतेसम्मको औपचारिक भ्रमणका क्रममा नेपाल र बंगलादेशबीच ब्यापार,पर्यटन, कनेक्टिभिटीलगायतका विषयमा महत्वपूर्ण छलफल भएको मन्त्री ज्ञवालीले बताए ।
द्विपक्षीय वार्ताका क्रममा जलविद्युत लायत उर्जाका स्रोतहरुको विकास तथा व्यापार गर्ने विषयमा सहमति भएको ज्ञवालीले बताए । त्यस्तै बंगलादेशका वाणिज्यमन्त्री टिपु मुन्सीसँगको वार्तामा बंगलादेशमा निर्यात प्रवद्र्धन र दुवै मुलुकबीच कनेक्टिभिटी वृद्धि गर्ने सम्बन्धमा छलफल भएको जानकारी दिए ।
मन्त्री ज्ञवालीले नेपालका नदी भारत र बंगलादेशका नदीहरुसँग जोड्ने र जलमार्गको विकास गर्ने समझदारी भएको समेत जानकारी दिए ।
दुवै देशबीचको सम्पर्क सन्जाललाई अझ विस्तार गर्न दुवै देशका नजकि रहेका सहरहरुबीच सिधा हवाई उडानको व्यवस्था गर्ने, सडक मार्गको सुधार तथा रेलमार्गको सञ्जाल विस्तार गर्ने समझदारी भएको ज्ञवालीले बताए ।
