१६ फाल्गुन, बिराटनगर । मोरङ र झापा जिल्लाका ३ छुट्टाछुट्टै स्थानबाट लागुऔषध सहित ५ जनालाई प्रहरीले पक्राउ गरेको छ ।
बिहिवार दिउँसो प्रहरी चौकी कोयलपुबाट खटिएको प्रहरी टोलीले चेकजाँच गर्ने क्रममा को १४ प ८६७९ नम्बरको मोटरसाइकलमा सवार रहेका चालक सुन्दरहरैचा ११ का ३३ बर्षीय सुरेन्द्र राई र मोटरसाइकलको पछाडि सवार रहेका इटहरी उपमहानगरपालिका ५ का २६ बर्षीय मनिष परियारलाई लागुऔषध सहित पक्राउ गरेको हो ।
पक्राउ परेका उनीहरुको साथबाट प्रहरीले एभिल ३८ ट्याब्लेट, फेरागन १९ ट्याब्लेट, डाईजोल्याब २४ ट्याब्लेट, लुपिजेसिक २४ ट्याब्लेट, सामसुङ मोवायल २ थान, लेनोभो मोवायल १ थान र नोकिया मोवायल १ थान समेत बरामद गरेको छ ।
यसैगरी जिल्ला प्रहरी कार्यालय मोरङबाट खटिएको प्रहरी टोलीले शुक्रबार बिहान बिराटनगर महानगरपालिका ११ का २६ बर्षीय दिपेश श्रेष्ठ र निजकै श्रीमती २१ बर्षीया तृष्णा श्रेष्ठलाई लागुऔषध सहित पक्राउ गरेको छ । उनीहरुको साथबाट प्रहरीले लुपिजेसिक, एभिल र डाईजोल्यापनामक २६० ट्याब्लेट लागुऔषध बरामद गरेको थियो भने ३ थान सिरिन्ज समेत बरामद गरेको छ ।
यस्तै लागुऔषध नियन्त्रण ब्युरो काकडभिट्टाबाट खटिएको प्रहरी टोलीले मेचिनगर नगरपालिका ६ बाट लागुऔषध सहित १ जनालाई पक्राउ गरेको छ ।
बिहिवार साँझ कमल गाउँपालिका ५ का २३ बर्षीय मनिष धिमालको साथबाट डाईजेपाम २६ ट्याब्लेट,फेनारागन २६ ट्याब्लेट र लुपिजेसिक २६ ट्याब्लेट बरामद गरेको हो । लागुऔषधसहित पक्राउ परेका उनीहरुको सम्बन्धमा थप अनुसन्धान भईरहेको प्रहरीले जनाएको छ ।
