२२ फागुन, विराटनगर ।
गत डिसेम्बरमा चीनको हुबेई प्रान्तबाट फैलिन सुरु भएको कोरोना भाइरस (कोभिड–१९)का कारण हालसम्म ३ हजार २ सयभन्दा बढीको ज्यान गइसकेको छ भने विश्वभर करिब ९५ हजारभन्दा बढीसंक्रमित भएका छन् विश्व स्वास्थ्य संगठनले नेपाललाई पनि कोरोना भाइरस फैलन सक्ने उच्च जोखिम रहेको मुलुक भनेर घोषणा गरेपछि नेपालमा तीनै तहका सरकार भाइरसलाई भित्रिन नदिन लागिपरेका छन् ।
तीनै तहका सरकारले भाइरसबाट बच्न उच्च सतर्कता अपनाईरहेको छन । हालसम्म विश्वका ८० बढी देशमा यो भाइरस फैलिए पनि नेपालमा भने कुनै व्यक्तिमा कोरोना भाइरसको संक्रमण देखिएको छैन । विश्वभर तीव्र रुपमा फैलिरहेको भाइरसलाई मध्यनजर गर्दै देशभर विभिन्न सचेतना कार्यक्रमहरु सञ्चालन भइरहेको छन ।
त्यसैक्रममा विराटनगर राउन्ड टेवल नं. ५ ले पनि कोरोनाभाइरसको संक्रमण हुन नदिन सावधानी अपनाउनुपर्ने भन्दै सचेतनामुलक कार्यक्रमको आयोजना गरेको छ । विराटनगर हाटखोलामा रहेको सुशिक्षा निकेतन स्कुलका विद्यार्थीहरुलाई सचेत र जागरुक गराउन विराटनगर राउन्ड टेवल नं. ५ ले विहिबार एक सचेतनात्मक कार्यक्रमको आयोजना गर्यो ।
कार्यक्रममा निम्न माध्यमिक र माध्यमिक तहका विद्यार्थीहरुलाई कोरोना भाइरसबाट बच्न अपनाउनु पर्ने उपायहरुको बारेमा विस्तृतमा जानकारी गराइएको विराटनगर राउन्ड टेबल नं. ५ का अध्यक्ष अश्विनी बंसलले बताए । कार्यक्रममा न्यूरो कार्डियो एण्ड मल्टिस्पेसियालिटी अस्पिटलका डा. फणिन्द्र मण्डलले विद्यार्थीहरुलाई नियमित साबुन पनीले हात धुने, मास्कको प्रयोग गर्ने, रुघाखोकी, ज्वरो जस्ता लक्षण देखिए तुरुन्त स्वास्थ्य जाँच गराउने, लक्षण देखिएकाहरुको सम्पर्कबाट टाढा बस्ने, जंगली वा पालुवा पशुपक्षीको असुरक्षित सम्पर्कबाट टाढा बस्नेलगायतका बारेमा जानकारी गराएका थिए ।
कार्यक्रमको अवसरमा विद्यार्थीहरुलाई साबुन र कक्षा ५ देखि ८ सम्मका विद्यार्थीहरुलाई मास्क पनि वितरण गरिएको थियो ।
