७ चैत, काठमाडौं । पूर्वमन्त्री गोकुल बाँस्कोटाको भक्तपुरस्थित लोकन्थलीको घरमा बम विस्फोट गराएको आरोपमा प्रहरीले थप तीन जनालाई पक्राउ गरेको छ ।
पक्राउ पर्नेमा कैलाली स्थायी घर भएका लक्ष्मण सेठी र अमृत कुमाल तथा कालिकोटका अभिषेक गिरी भन्ने टेक लोहार रहेको महानगरीय अपराध महाशाखाका प्रमुख एसएसपी सहकुल थापाले बताए ।
महानगरीय अपराध महाशाखाको टोलीले राजधानीको विभिन्न स्थानबाट तीन जनालाई पक्राउ गरेको हो । उनीहरुमाथि थप अनुसन्धान भइरहेको महाशाखाका प्रमुख एसएसपी सहकुल थापाले बताए ।
गत फागुन २८ गते पूर्व सूचना तथा सञ्चार प्रविधिमन्त्री बाँस्कोटाको घरमा बम विस्फोट भएको थियो । सोही दिन विस्फोटमा संलग्न भएको आरोपमा प्रहरीले विप्लव समूहको भक्तपुर जिल्ला सदस्य रहेको देवी बहादुर गुरुङलाई पक्राउ गरेको थियो ।
बम बिस्फोटबाट बाँस्कोटाको घरमा रहेको एउटा मारुती कार पूर्ण क्षतिग्रस्त भएको थियो भने बाँस्कोटा निवाससँगै रहेका अन्य घरमा समेत क्षति भएको थियो ।
उक्त विस्फोट पछि घटनाको छानबिन हुनुपर्ने र दोषीलाई कारबाही हुनुपर्ने दबाब बढेपछि प्रहरीले गंभीर रुपमा घटनाको अनुसन्धान गरिरहेको छ । प्रहरीको प्रारम्भिक अनुसन्धानले प्रतिबन्धित बिप्लब समूहको घटनामा संलग्न रहेको देखिए पछि सोही समूहलाई लक्षित गरेर अनुसन्धानको दायरालाई साँघुरो बनाएको छ । (रासस)
