१७ बैशाख, काठमाडौं । बुधबार बसेको नेपाल कम्युनिष्ट पार्टी (नेकपा) को सचिवालय बैठक कुनै औपचारिक निर्णय नगरी सकिएको छ ।
पछिल्लो समय पार्टीभित्र देखिएको आन्तरिक विवाद सुल्झाउन डाँकिएको बैठक कुनै पनि औपचारिक निर्णय नगरी सकिएको हो ।
पार्टीभित्रको आन्तरिक विवाद र सरकार सञ्चालन लगायतका विषयमा छफफल भएपनि कुनै निर्णय भने हुन सकेन् । पार्टी प्रवक्ता नारायणकाजी श्रेष्ठले वैशाख २० गते अर्को बैठक बोलाउने गरी बैठक सकिएको बताए । सो बैठकमा नेतृत्वले आन्तरिक गृहकार्य गरी आफ्ना विषयवस्तु प्रस्तुत गर्ने उनले बताए ।
प्रवक्ता श्रेष्ठले भने, ‘‘पार्टीभित्रको आन्तरिक समस्या, पार्टी एकताको सुदृढिकरणको महत्व, सरकार र केही कमरेडहरुले माग गर्नुभएको स्थायी कमिटि बैठकका बारेमा र यससँग जोडिएका विविध पक्षका बारेमा बैठकमा छलफल भयो । छलफल जारी नै छ । यो बिचमा पार्टीको नेतृत्व टिमले अनौपचारिक गृहकार्यको प्रकृया अगाडी बढाउँदै २० गते पुन सचिवालय बैठक बस्ने निर्णय गरेको छ ।’’
२० गते बस्ने बैठकले अहिलेको आवश्यकतासँग मेल खाने गरी पार्टीलाई एकतावद्ध ढंगले अगाडी बढाउने विषय र स्थायी कमिटी बैठकका विषयमा निर्णय गर्ने उनले बताए । पछिल्लो समय पार्टीभित्र आन्तरिक विवाद चर्किँदै गएको छ ।
