२२ असार, एजेन्सी ।
नायक अजय देवगणले जुन १५ मा भारत र चीनका सैनिकहरूबीचको झडपमा २० जना भारतीय सैनिकको निधन भएको घटनालाई फिल्ममा उतार्ने भएका छन् । गलवान नामक क्षेत्रमा भएको यो घटनामा सैनिकले देशका लागि कसरी लडे र उनीहरू शहीद भए भन्ने विषयमा अब अजय देवगणले चलचित्र बनाउने भएका हुन् ।
भारतीय सैनिकहरूको सम्मानमा उनले यो चलचित्र बनाउन लागेको बताएका छन् ।सन् १९७५ पछि भारतीय र चिनियाँ सैनिकबीच झडप भएको थियो । यो चलचित्रलाई अजय देवगण फिल्मस् र सेलेक्ट मिडिया होल्डिङ्स एलएलपीले मिलेर बनाउन लागेका हुन् । चलचित्रले चिनियाँ जनमुक्ति सेनासँग लडाइँ लडेका २० सैनिकको योगदानको कथा भन्नेछ । चलचित्रका लागि कलाकारहरू फाइनल गर्ने क्रममा अजय छन्।
अजय अभिनित राष्ट्रियताको कथा बोकेको चलचित्र ‘भुज’ डिजिटल रिलिजको तयारीमा छ । अजयले काम गरेको चलचित्रमा उनले भारतीय प्रहरी, राष्ट्रियता र सैनिकको विषयलाई उठान गर्दै आएका छन् ।
