२५ साउन, काठमाडौँ ।
सत्तारुढ नेपाल कम्युनिष्ट पार्टी नेकपाका सांसदहरुले पार्टी एकता जोगाउन नेतृत्वलाई दबाब दिने भन्दै ६१ जनाको हस्ताक्षर संकलन गरी सार्वजनिक गरेका छन्।
आइतबार दिउँसो सिंहदरबारमा नेकपा संसदीय पत्रकार सम्मेलन गर्दै उक्त हस्ताक्षर सार्वजनिक गर्दै सांसदहरुले पार्टी नेतृत्वलाई बुझाएका हुन्। ६१ जनामा प्रतिनिधिसभा र राष्ट्रियसभा दुवै सदनका सांसदहरु छन्।
पार्टीमा विभाजनको खतरा बढेपछि नेकपा संसदीय दलको कार्यालयमा आयोजित पत्रकार सम्मेलनमा तीनवटै गुटका सांसदहरुले एकताका पक्षमा हस्ताक्षर सार्वजनिक गरेका हुन्। प्रतिनिधिसभामा नेकपाका १७४ सांसद छन्। यस्तै राष्ट्रियसभामा नेकपाका ५० सांसद रहेका छन् ।
पार्टी विभाजनको अवस्थामा पुग्न थालेपछि एक महिनाअघि देखि नै सांसदहरुबीच हस्ताक्षर संकलन अभियान सुरु भएको थियो। प्रधानमन्त्री र पार्टी अध्यक्ष रहेका केपी शर्मा ओलीले दुवै पदबाट राजीनामा दिनुपर्ने माग उठेपछि नेकपा विभाजनको संघारमा छ।
पार्टीका कार्यकारी अध्यक्ष पुष्पकमल दाहाल प्रचण्डले वरिष्ठ नेता माधव कुमार नेपाल समूहको समेत साथ लिएर ओलीलाई हटाउन खोजेका छन्। तर ओलीले आफूले कुनै हालतमा दुवै पदबाट राजीनामा नदिने बरु पार्टीले कारबाही गरे छुट्टै पार्टी घोषणा गरेर अघि बढ्ने चेतावनी दिँदै आएका छन्।
यही बेला सांसदहरुले विभाजनका विरुद्ध खबरदारी गर्दै पार्टी एकताका पक्षमा दललाई हस्ताक्षर बुझाउन थालेका हुन्।
